عزيزي كيمو .. قررت أصدمك في مشاعرك

صديقي العزيز محمد كمال حسن

بالرغم من أنك حالقلي أنجليزي , و مش معبرني بالمرة .. فأنا متابع مدونتك من شهور

وخصوصا سلسلة الوجع التمانيني اللي أنت عاملها

يمكن تستغرب لو قلتلك أني بعد ما قريت "ولد مواليد واحد وثمانين يقابل بنت مواليد سبعة وثمانين" بشهر , و صلني بوستين من أتنين أمريكان على موقع ماي-سبيس و تقريبا كان ليهم نفس أجواء موضوعك .. طبعا لو أخدنا في الأعتبار أن كل النجوم و الأفلام و البرامج و ... كانت أمريكاني .... الظريف أني بعدها بفترة و صلني بوست تالت من بنت عندها 18 سنه أسمه

Are You a 90s Kid ?!!

فجالي إحساس - بعد ما لقيت أن الموضوع وصل للتسعينات كمان - أن الوجع قد أصبح شاملا كالدمار الشامل في جو العولمة

و طبعا لأني عارف أن مدونتك مش بالشهرة دي - من غير زعل - و لأني عارف أن ثقافتك الأنجليزية على قدك - من غير زعل برضه - و لأني عارف أن التلاتة الأمريكان ما يعرفوش بعض أصلا

أفتكرت عم عبدالرحمن أبو زهرة و هو بيكلم مراته في التليفون في فيلم النوم في العسل و بيقولها : دي حاااااالة عااااااامة

*

صديقي العزيز .. ولأني ما أرضالكش الدمار الشامل - أو الحالة العامة - قررت أصدمك في مشاعرك

طبعا زي ماهو واضح من الصور اللي فوق ده سيادتك وانت هتموت مالرعب .. برغم أنك أظهرت شجاعة غير عادية في شيل الكتكوت .. و اللي تحت ده هو العبد لله و هو هيموت م الهطل
متأكد جدا أن في لحظة ممكن أي حد فينا يرجع عيل من أقل حاجة .. فيلم , برنامج , كورونا ، كتكوت

بس الأكيد يا صديقي أن إحنا - زي انت ما قلت - كنا عيال من عشرين سنة .. ولو قعدنا نفكر في نفسنا على أننا عيال هيجيلنا تخولوف صدقني .. لأن الناس بتكبر , و بتموت , و احنا كمان بنكبر و هنموت , و ما فيش داعي نفضل طول حياتنا مستنيين المترو اللي بعده

و علشان أصدمك في مشاعرك بجد شوف الفيديو ده ...


البنت دي كانت فتاة أحلام كل طفل عربي تمانيني .. و ما بكدبش لو قلت أنها كانت سبب رئيسي فاني أكون شاعر .. و اللي يضحك أنها كانت فتاة أحلامي لحد من شهر .. لحد ما قابلتني الصور دي